دق دق دق دووووق .. مين عالباب ؟ يا ستي هذه جارتنا أم نازك ... أها .. تفضلي يا أم نازك .. لا معلش يا حجة والله تمي بيوجعني ومش قادرة أحكي .. طيب يا ستي هيني رايح عالمستوصف بدي أتحكم "بنات دِنَيّْاَ" نازلات .. الله معك يا ستي. .. وأنا ماشي في الشارع إلاَ مرت عمي أم حسن طالعة من بيتها وحاملة كياس في يدها وابنها " الفنكر " ماشي وراها بطقمين "قزاز" ! . وين يا مرت عمي رايحة ؟ والله رايحة أبارك لكنة بنت خالتي، أمها أجت من العمرة مبارح !!! وااااااال ولشو كل هالغراض والهدايا !؟ . يييي أي والله الواحد بيكبر جهده وبيخجل ما يجامل الناس ! .. أها وماله عمي أبو حسن حاطط ايده على خده وزعلان ؟ الله يعينه أبو حسن مبارح خلصت بطالته الشهرين وبيستنى رحمة ربه ببطالة جديدة ! ... اخخخ والله منا عارف كيف بدنا رحمة ربنا تنزل واحنا مش راحمين حالنا ! الله معك يا مرت عمي بلاش تتأخري عالواجب ويكبر جهدك ! . وقفنا سيارة عن الخط مش قادر أمشي وقلنا بلكي نصل بدري، المهم في نص الطريق إلا و الشارع مسكر ايش الدعوة يا جماعة بشوف في سيارتين واقفات في نص الطريق قبال بعض معقول خربن في وقت واحد !؟ ... رد السواق : لا يخووو هذا سواق معوش فكة ، بيفك من سواق تاني ! " أوخ " والله بدها "شخرة" على هالصبح وفي نص الطريق !!؟؟؟ مهو بتلاقي أبو نظمي مد ال100 شيكل تبعته للسواق مهو متعود على هالعادة " .... " تبعته علشان تقله خلص خلي علينا ! . الله يجيبك يا طولة الروح !، شو هالبلادة ؟ مفيش إحساس في العالم اللي بدها تقضي مصالحها ؟ مفيش ذوق ؟ يالطيييييف !. ومشيت السيارة وعند سوق الخضرة إلا وكمان مرة الطريق مسكرة خير شو في ؟ شايف زحمة وطوش وبهادل، مهو في كم واحد مبسطين في نص الشارع والسيارات مش عارفة تمرق ! . عصبت وصرت أزعق يا عمي وين البلدية وين الشرطة شو هالقرف !؟ ... إلا وواحد من الركاب شكله شارب عصير "قريص" على هالصبح وبضبة مرخية بيحكي : أي انتوا ما بدكم تخلو الناس تترزق ؟ خلوهم يبيعو ويترزقوا ! ... أخخخ يا مغص بطني ،، يعني يترزق على حساب مصالح الناس !؟ شو هالفهم هذا ... فتحت باب السيارة وحلفت يمين غير أكمل المشوار مشي خليهم يترزقوا ! . وأنا ماشي و"بتقصوع" من شده الوجع ، إلا وسيارة مسرعة والسواق ضارب زموووور لمس أهلي لمس، وواحد من الركاب مطلع رأسه من الشباك وبيصرخ يا زلمة امشي عالرصيف ، لسه بدي أحكي إلا وزلمة ختيار كاين ماشي وراي بيحكي : هو وين الرصيف يخو ..؟ مالرصيف قسمته البلدية زمان ... وصار لبياع الخضرة ولتبع السوبرماركت وللحام وبياع الجاج هو ضل رصيف في بلدك نمشي عليه !؟ الله ينصر دينك يا حاج والله فشيت غلي قال امشي عالرصيف قال ! . وأخيراً وصلنا كندا ... قصدي المستوصف وعرضت حالي على الدكتور ... اه شو بدك أكتبلك ؟! ليش هو مين الدكتور ؟! وبعدين لو عارف ايش بدي ما كنت سافرت هالسفر !؟ يا رجل "بنات دِنَيّْاَ" نازلات ومقشعر وحالتي شلش ... طيب طيب هاي شريط كبسولات وشريط أكامول وبتروق ان شاء الله ...اها شكراً يا دكتور فعلاً أمضيت سنوات عمرك بحثاً عن العلم .. ألا طزاً بهذا العلم إذا كان هيك ! . قال ايش أكتبللك !! . أقبضي يا وزارة الصحة ! . وأنا طالع من باب العيادة أمشي غضباً إلا وصوت غواش وزعاق يا ساتر ايش فيه ؟ قالوا واحد جاي يتحكم عن مرته !... هيك " تعادل " . روحت عالبيت وأم نازك لساتها بتحكي مع ستي، وستي بتلوي بوزها شمال ويمين مش عاجبها .... أي مهو حاجة بتقهر رسمي ...قال شو تمها بيوجعها ! . [title]ملاحظة / مقالات "بالبلدي الفسيح" تكتب باللغة العامية البحتة ..[/title]