نحن في عصر الشك والربية والقلق والأسئلة الدائمة والتناقضات المختلفة، إلَّا أن أكثر الكلمات في غزة استخداماً "ما تقلقش"، صحيح هو بعد هيك شو ظل؟ يا سيدي وإن غرقت لحِّقها رجلك، وين ما تحط راسك حط رجليك...
وبعدين لماذا القلق؟ ولدينا ما يكفي لنجلِّي أنفسنا فيه... والله رؤية بعض الناس بتشيل الهم، ختيار عجوز مطقًّعة معاه يحدثني عن ذكريات زمان... بيرجع صبي، يا سلام.
بعيداً عن الكهرباء والمياه والشوارع والرواتب... لازمنا نشرد شوي عالبحر، مع بعض الأصدقاء نتحدث عن كل شيء إلا البلد وهمومها.
وفي ناس نفسها تحكي وتقول ما يحلو لها... يا عمي يحكوا، البلد ضيقة، والحمار رفَّاص، وغزة كلها شبرين ونص...لذلك حلو جداً أن تكون هناك نقاشات ومناظرات، ولازمنا والله، طاولة كبيرة طول خمسمية متر عليها خمسمية نفر، وتتنقل من مدينة لمدينة يجلس عليها الكبار والصغار النساء والرجال، حتى يزيلوا القلق... أنا مش قلقان والله.
