علاء الريماوي
تواصل حماس المسرحية في جزئها الثاني، بالتنسيق مع نتنياهو وايزنكوت قائد الاركان. ففي الاجتماع السري الي جمع الزهار ونتنياهو وبحضور السنوار، جثي نتنياهو على ركبتيه مستعطفا الزهار قائلا .... ليبرمان قاهرني، بدي اطيره مش عارف، ما الحل؟ الزهار رد عليه عندي الموضوع وما تسأل، رساله للضيف بدي خبطه من غرفة العمليات المشتركه لعسقلان وتنزيل عماره واذا ما عندكم صاروخ من هل النوع، ببعثه في خدمة "رنلي بوصلك حاجتك" أجاب لعيون صاحبنا نتنياهو أجاك بس يبعث عشرين صاروخ من هل النوعية.
نتنياهو صعد على ليبرمان بعد الحادثه.... ليبرمان الي نحشر بالزاويه رن على السنوار وقله هاك يا حماس ما الكم صاحب عسقلان يا سنوار وعماره فضحتوني مع الناس. السنوار رد عليه ولا يهمك انا بدي اقترح عليك اقتراح "تبلف "نتنياهو، أستقيل وشف نتنياهو والجيش وحطهم عند مسؤولية الفشل أمام حماس وهاك بتطلع منها.
ليبرمان سره الموضوع وخبط مؤتمر صحفي رفعه مقعدين في استطلاع الرأي الأخير ورط نتنياهو في الفشل. صديق محلل قريب من عين السحيجه، مخترق اتصالات حماس كاتب على صفحته، صور القسام هاي الها قصه واضحة، الموضوع مش انجاز والسيارات كمان هاي الها قصه ليس لها علاقة بموساد والهبل تاع غزة. مجموعة من الجنود على حدود غزة ومجندات بينهم علاقة غير شرعية، لما انفضح الموضوع صاروا بدهم يخلقوا أزمه بعثوا صورهم لأبو عبيده، وحكولوا دبرنا بقصه تخلق أزمة على مستوى البلد حتى نسوانا تنسى الموضوع. ابو عبيده دبر البيان والصور، وخلق من القصة أزمة للموساد والجيش والمجتمع، وهاك ضرب قصة الجنود الصغيره بالقصه الكبيرة.
الصديق قال المشكله أـبو عبيدة كبرت في رأسه، وشاف الموضوع في تفاعل على السوشال ميديا وقرر يعمل مؤتمر صحفي رح يخبط أكم خبطه فيه.
تنياهو وصله الخبر واتصل على أبو مرزوق والشامي والسويركي ليتوسطوا عند عند العسكر، ليوقفوا الموضوع .... العسكر قالوا بنوقف الموضوع بمقابل المنحة القطرية. السيسي عز عليه الموقف، وطلب من وزير المخابرات ايلم الطابق، مقابل استضافة وفد حماس والجهاد في القاهرة على كشري ويا دار ما دخلك شر.
عشان المصداقية مصدر في حماس ثقيل اتصلنا عليه للمهنية وسرب النا ثلاث معلومات غاية في الأهمية.
الأولى: هناك جناحين في حماس متقاتلين شايطة بينهم واحد تابع لإيران والثاني لتركيا، والطرف التابع لمصر بحاول يخلق تقارب بينهم، لكن الطرف القريب من الموزنبيق مخرب الامور، لأنه جماعة كوستريكا في حماس الهم مصلحة في التصعيد فدخلوا الطرف المقرب من جزر القمر ليحرك جماعة حماس المحسوبين على المخابرات الصوماليه المقربة من جهات اوروبية ومتحالفه مع جماعة بوتين.
ثانياً: حماس عقدت لقاءات سرية للغاية مع اوباما وطلبوا منه مطلبين محددات، فرد عليهم أنا خارج السلطة، بس برن على ترامب، أنا ماسك عليه ممسك وأدله حول دعم الروس إله في الانتخابات، وافق ترامب بشرط أربع قناني شطه ايجيبهم البردويل الي طار عبر مطار اللد لأمريكا وجلس مع أوباما، في نفس الليلة اجا بلير، ولحقتهم المستشارة الالمانية، وهناك صار نقاش اختلفوا على بعض الامور مما أدى الى استدعاء اردوغان إلى لم القعدة.
ثالثاً: العاروري ما أعجبه الموضوع اتصل على أحد الآيات وطلب اجتماع فوري، أجا عليه السستاني، وجماعة قم، وشلة الشيعة في العالم واتفقوا على بناء تحالف في المنطقة لقطع الطريق على التسويات التي يجريها البردويل في أمريكا، الموضوع أعجب ابن سلمان، الي طلب من العاروري يسكر قصة الخاشقجي مقابل 100 مليار، 30 لتركيا، 20 لمجلس عاروره، و50 للأصحاب.
للأمانة وأنا بكتب وبستسقى حكي من المهلوسين الطاعنين في المقاومة شتات، ومش عارف أطلع من الحلم، بعد عزومة اعليش على الكرشات أمس. جماعة الطعن في المقاومة، يستسقي حقده من جلسة في الحمام، ينسج الخيال من وحي المكان، ويركب مشهد يناسب المكان. العيب مش بحالة الكتابة ورجالاتها، العيب على من يبيعون عقولهم ويبنون الفكر وتصوراتهم على ورق التواليت.
أضحى الخلاف والاختلاف مقيتا ومسيئا ومعيبا لذلك دعوة هل المقال المخربط تعالوا نجمع على قوة الشعب حين ينتصر وعلى الايجابية حين نفعلها، وخلونا من حديث الكراهية والتخبيص الذي ينهك الشعب ويعزز عدوه.
