اقترب العيد وكالعادة اقتربت معه مصاريفه المخيفة التي تهاجم جيوب الموظفين كما يهاجم الجراد المزارع فيتركها خاوية وأثر بعد عين, فبين ملابس الأطفال والحلويات والعيديات يقضي العيد على آخر قرش في جيب صاحبنا سعيد الموظف الذي يواجه هذا العام أزمة من نوع آخر تتمثل في رغبته بأداء نذره وذبح خروف في عيد الأضحى, جمع سعيد كل ما لديه من راتب وعلاوات ودوام اضافي واستعد لمواجهة العيد عارفا مسبقاً أنه مغلوب وأن وحش العيد سيفترسه من أول لحظة وسيكون كل ماله في خبر كان . بينما هو في أفكاره أرجعه صوت زوجته إلى عالم الواقع وهي تقول : - ايدك يا سعيد - عايزة ايدي تعملي بيها ايه؟ - انت بتهزر؟ ايدك على الفلوس - هي فين الفلوس علشان أحط ايدي ولا رجلي عليها ؟ - لا دا انت رايق بقى, اديني فلوس علشان عايزة أجيب هدوم للأولاد -يادي الهدوم اللي ما بتخلصش كل يوم هدوم هدوم اجابته زوجته باستهزاء : - لا معاك حق ونجيب هدوم ليه؟ خليهم يروحوا بيت القرايب بالبيجاما ايه رأيك؟ - والله ما دام فيها توفير ما فيش مانع !!! - انت يا راجل عايز تجنني ؟ ايدك على ألف جنيه - ألف جنيه؟ ليه؟ انتي حتلبسيهم شقة مفروشه؟ انتي ما بتسمعيش أخبار؟ مش شايفة أزمة السيولة العالمية؟ - لا حلبسهم عمارة على النيل !!! انت يا رجل فاكر إن الألف جنيه لسه فلوس ؟ دي يا دوبك تجيب حتتين هدمة للولاد وكمان درجة تانية. - بس أنا كنت عاوز أذبح خروف السنة دي !! - تدبحه السنة الجاية حيحصل ايه يعني ؟ ولا خايف انهيار البورصة يقضى على الأغنام كمان زي ما قضى على السيولة؟ - خلاص خلاص آدي الألف جنيه وربنا يسهل وأقدر أجيب خروف بالباقي ذهب سعيد إلى المحل المخصص لبيع الأغنام واتجه نحو أحد تجار الأغنام الذي كان جالساً على كرسيه وكأنه أحد الباشوات سلم سعيد عليه وقال : - السلام عليكم يا معلم لو سمحت عاوز اشتري خروف - وعليكم السلام ما فيش هنا لو سمحت هنا فيه لو دفعت كل حاجة هنا بالفلوس يا حبيبي - طيب عاوز خروف لو دفعت !!! - عاوزه بلدي ولا أجنبي ؟ - وايه الفرق ؟ - البلدي سعره ضعف الأجنبي - ما شاء الله, الخروف قدر يتفوق على الأجانب والبني آدم عندنا لسه الأجنبي سعره مليون ضعف البلدي , شوف الأمريكي اللي يتقتل بياخدو غرامته بالملايين والعربي يا حبة عيني يتقتل ولا حد بيدفع غرامة ولا عشرة دولار حتى, يا ريت نتعلم من الخرفان ازاي نحترم ابن البلد ونقدمه على الأجنبي. نظر تاجر الأغنام إلى سعيد بشكل مريب وقال: - انت جاي تشتري خروف وإلا تلبسني تهمة؟ أمريكان مين وعرب مين ؟ - خلاص يا عم ما تزعلش أنا طالب القرب منك في خروف واحد يكون على قد حاله زيي كده نظر إليه تاجر الأغنام باستخفاف وقال: - لا لو كان زيك ما يبقاش خروف, ده يبقى يا دوبك ديك رومي !! - الله يكرمك, المهم أرخص خروف عندك بكام ؟ - ألف جنيه - هي حكاية عفريت الألف جنيه اللي راكب الكل النهارده؟ مراتي عايزة ألف جنيه انت عايز ألف جنيه !! تكونش الألف جنيه بقت فكة ؟ - والله هو ده الموجود أجيبه ؟ - هات يا سيدي نادى المعلم على أحد صبيانه وأشار إلى أحد الخرفان فذهب الصبي وجلبه وكان خروفاً هزيلاً نحيفاً لا ترى عليه أي لحم نظر سعيد إلى الخروف وقال : - ايه ده يا معلم ؟ خروف ده ولا عارضة أزياء؟ - عارضة ايه؟ انت بتقول كلام غريب ومش مفهوم ليه؟ هو ده الخروف عايزه ولا لأ ؟ - بس ده شبه كلاب الصيد يا معلم لا له لحم ولا عظم ولا فروة !! وأي من معالم الخروف - هو موديله كده ده خروف أجنبي !! - والله حتى لو كان السفير الأمريكاني شخصيا ما يسواش ألف جنيه, ده بالسعر ده مش أنا اللي حأدبح الخروف ده الخروف هو اللي حيدبحني !!! حأستنى للسنة الجاية جايزة سعر الخروف ينزل زي سعر النفط !! وكل عام وانتم بخير وعيد سعيد على الجميع بإذن الله