<< آه يا حج ، كيف هالشتوية معك!! والله يا بني ، أحلى شيء إنه الواحد في بيته ما بشوف بشر >> شو الدعوة مالنا ، كلنا في الهوا سوا..! طلعت يا بني بلادنا بلاد صيف مش شتا ، صدق اللي قال المية تكذب الغطاس ، ما في شغلة إلا وفيها عيب وغش ، شو فش أمانة وصدق في البلد ، الله يسترها علينا دنيا وآخرة. >>شو مالك يا حج ، هيتك واقع في "جورة مية" ، ولا مشان راح عليك "جمع الظهر و العصر " هدي هدي ، صحتك بالدنيا!! لا مش هيك يا بني، بس معقول شوارع لسه طازة وما تعرف تمشي عليها ، كله غرقان وخربان في هـالبلد ، أي إذا "الجسر" غرق ، ضل شي بعد هيك ، صار بدك حسكة مشان تروح من شارع لشارع ومن حارة لحارة ، بدها دورة غطس كمان. >> والله فكرة يا حج شو رأيك ، نستورد ونبيع حسكات للناس ، فرصة نسترزق!! بطل مسخرة عاد !! بس شو بدو يصير فينا لو وصلنا اعصار زي "تسونامي" ولا "ساندي" ، إذا "شوية منخفض جابنا الأرض"!! >> جبتها لحالك ، أي إذا أمريكا غرقت ، وقفت علينا يعني "الحال من بعضه يا حاج " ، بيني وبينك خليها تتربى جاية تتشاطر علينا بس. سيبك من الشماتة ، ربك إله حكمة بكل شي ، لو صار وصلنا ريح "تسونامي" ولا "ساندي" بس ، كان يا بني ما شفتني ولا شفتك !! ع اللي أنا شايفه "فش حاجة عدلة في البلد" ، بصير كل واحد فينا نسخة عن "فيليكس" ، آآآآآآآه لما كنا نشتغل عند اليهود.......!! >> رجعنا للكفرة ثاني، انس يا حج انس!! كفرة كفرة ، لكن بشتغلوا صح ، الصحيح صحيح. >> يا سيدي هيو صار إلنا دولة و"شلومو" جارنا ، وبكرة بصير تبادل تجاري وصناعي واستخباري بزيادة وعمالة كمان!! كود ترجع أيام العيش والملح زي أول وأحلى. "تف من تمك ، تف" ، قال دولة قال ، هذي "دولة عرة" ع قولة أبو خالد الزهار ، والله هذا الزلمة بحبه ، عدل ع طول زي المسطرة، وأحلى شيء ، بدو يحبس عباس إذا أجى ع غزة ، لا بدنا هدول الناس ولا حبايبهم اليهود ، بدنا نرجع ع بلادنا وبنزبطها من جديد . >> بدينا " انْلُكْ "بالدولة وعباس !! صاير " ثائر" يا حجي ، لسا احتفالات الثورة ما نسيناها!! شو هالدولة اللي ما بتأكل عيش ، عند شوية مطر كله بفتح تمه ، وبرفع رجله ، يعني غزة منيلة بستين نيلة وفهمنا ، طيب والضفة وين بناء مؤسسات الدولة ، ووين المشاريع والانجازات اللي زَلْ أبونا فيها فياض ، حتى رواتب " للي نايمين عند نسوانهم " فش كمان. >> "طالعة معك كثير يا حج " هسه صار مش عاجبك ، أكبر "صحن مفتول" وأزكى "رز كبسة" وأطول فستان وأقصر مهرجان ، شوية وموسوعة غينتس تفتح قسم خاص " بالفلسطيني" وبعدين معك ، هاي اللي شاطرين فيه ، ناس وصلت القمر واحنا غرقنا بشوية مطر ومش شاطرين إلا بالأكل وشحتة الدولار ويا ريت شايفين حاجة، وبدكو دولة لسه !! يا عمي خلينا نصدق مع بعض ، ونخلص بعملنا ، وأقل شيء نصلح شوارع الوطن مشان ما نتأخر بالعودة ، اشتغلوا للدولة صح ، مش تشغلوا الناس فيها. اسمعني ، روووح قل لأمك اعملي "ذرة فشار" وهاتها نتسلى بدل كلامك اللي برفع السكر والضغط ، قال دولة قال ، وعند أقل مطب بتصيح وبتنيح "وين الملايين وين".