كان يا ما كان , في هذا الزمان , وقريباً من هذا المكان , ثلاث أصحاب : أبو الدبعي وحسن صبي وجمعة خميس عبد الأحد . أبو الدبعي كان أقوى واحد فيهم (هيك كانوا ينادوه , وابصر إيش اسمه الحقيقي) وحسن كان بركاتك يا شيخ بركات (والأولاد كانوا ينادوه "حسن صبي" من أيام ما كان في صف أول) . أما جمعة فكان خبزاوي , لا حمساوي ولا فتحاوي , اللي بيطعميه خبز بيكون معاه , وكان أخبث واحد فيهم . كان الثلاثة زمايل من الصف الأول , ويوم ما كان عليهم حصة إملاء , جمعة أخدها عشرة من عشرة , أما الاثنين أخدوا صفر مكعب في الإملاء , فأعطى مدير المدرسة جمعة قلم مبري وفي أخريته محاية . حسن صبي راح يبشر إم جمعة فقال : "زُمْعَة أخَدْ دَيَمْ , أنا أخَدِتْ سِفِيّ" , فزغردت إم جمعة وعرفت سعيتها أنه جمعة فلتة , وأنه راح يطلعها دكتور أو مهندس . ولما كبروا وصاروا في الثانوي , حسن صبي بطّل , وأبو الدبعي خش أدبي , وجمعة خش علمي علمك . في يوم من الأيام كان أبو الدبعي قاعد مع جمعة بيقصقصوا بزر وبينكشوا راس ع راس الشارع , فجأة إجا حسن صبي وفي إيده كوم أوراق ومعاه كهربائي . ولما شافوا حسن صبي بهالحال عرفوا منه أنه توظف في شركة الكهربا عن طريق عمه , وأنه جاي يرَكّب عداد الدفع المسبق في دار جمعة . - وشو هادا عداد الدفع المسبق يا حسن صبي أفندي ؟ - هادا يا جمعة يا سيدي اللي ما إنت بتدفع حق الكهربا أول , بعدين بتوصل الكهربا ع دارك . - وايش يضمّنّي أدفع , وتضلها قاطعة ؟ رد أبو الدبعي: "بتكون في زحمة في المواصلات , عشان هيك إنت وصلت قبلها خخخخخخ" . فقال حسن صبي : "عداد الدفع المسبق زي كرت الجوال , بتعبي كرت كهربا , بتيجي الكهربا , بيفضى الكرت , لازم تعبي كرت عشان تيجي الكهربا" . جمعة: "وقديش بيقعد الكرت لحتى يخلص" . أبو الدبعي: "حسب استعمالك يا روح إمك , في ناس بيقعدش عندهم الكرت يومين , وفي ناس بيقعد عندهم شهرين" . جمعة: "وقديش حق الكرت ؟" . حسن صبي: "حسب ما بدك , في كرت أبو الـ50 شيكل , وفي كرت أبو الـ100 شيكل , وفي كرت أبو الـ20 شيكل" . جمعة: "زكاتك , في كرت أبو الـ10 ؟" . أبو الدبعي: "في , بس بيوصل 9 شيكل , يعني ما بتلحق تحط الأواعي بالغسالة إلا والكرت خالص" . جمعة: "على هيك بنرَكّب فاتورة , أريح وأوفر" . رد حسن صبي: "ما كانت فاتورة من قبل وبطلت , ماش كانت فاتورة الكهربا توصل لباب الدار؟" . قال جمعة: "طب إيش أعمل أنا هلقيت؟ الكرت مش حيوفي , والفاتورة بطلت !" . حسن صبي: "ولا يهمك , شركة الكهربا عاملة حملات وخدمات بالهبل , خود مثلاً حملة (إضوي لمبتين , وإضوي التالتة مجاناً) , وخدمة (إضوي لي) , وحملة (جَمّع 500 فيوزة , واربح كرت أبو الـ10 ) , وخدمة (إضوي لي بالسيبة)" . جمعة: "فش خدمة (ثلاث دقايق بالسالب)؟" . أبو الدبعي: "في ربع ساعة مش بس ثلاث دقايق , بس ع الـ يو بي أس , أو ساعتين ع اللابتوب , أو عشر ساعات ع ماتور الكهربا" . جمعة: "وإذا يوم من الأيام كنت مركّب كرت , وقطعوها عليّ ؟" . حسن صبي: "سعيتها بيكون فش إرسال يا حبيبي" . جمعة: "يا حبيبي , كملت" .
نحن نستخدم ملفات تعريف الارتباط لتخصيص تجربتك ، وتحليل أداء موقعنا ، وتقديم المحتوى ذي الصلة (بما في ذلك
الإعلانات). من خلال الاستمرار في استخدام موقعنا ، فإنك توافق على استخدامنا لملفات تعريف الارتباط وفقًا لموقعنا
سياسة ملفات الارتباط.