حال الناس مع مسلسلات رمضان صار بحاجة لمسلسل يوضح العلاقة "الانفشاشية"، القائمة بين التكاثر الانشطاري للمسلسلات وبين شهر رمضان المبارك. الممثلين فاهمين البركة في رمضان غلط.. وصار يفكروا انو البركة يعني زيادة عدد المسلسلات، لحد ما صار بين كل مسلسل ومسلسل مسلسل، وبين كل ضغطة وضغطة على الريموت في حلقة جديدة، وإعلان بيخلص. والناس محتارين بين كل قناة والتانية، ولجان الإصلاح افتتحت قسم خاص بحل مشاكل التلفزيون، واقترح بعض المفكرين الاستراتيجيين توفير تلفزيونات من نوع (اتنين في واحد)، بتعرض أكتر من قناة بنفس الوقت. [color=blue]أنا بحثت عن حل .. [/color]في بداية رمضان، سمعت من المشايخ أكثر من درس كلهم بنفس العنوان "كيف نستقبل رمضان؟"، وكانو بيحكوا انو لازم نعمل جدول، سمعت النصيحة وقررت أعمل جدول للمسلسلات اللي ح أحضرهم في رمضان. بدأت بحصر القنوات، واستكفيت بـ 50 قناة HD، وبديت ساعة ساعة، والحمد لله طلعلي يومياً وقت 5 دقائق نوم، وإمكانية الصلاة ع النبي 3 مرات بشكل سريع، هادا في ظل انو ضحيت وحذفت 15 مسلسل من جدول المشاهدات لهذا العام. طبعاً الأمر بيتطلب توفير كهربا على مدار الساعة، ولهيك قررت اعمل اتفاقية مع صاحبي فرج، اللي خطهم عكس خطنا، انو نتفرج مع بعض، وعملنا مفاوضات للمسلسلات اللي ح نحضرها، والحمد طلع الجدول (مهلبية بالكستر). أكيد مهلبية بالكستر، طالما انتا بين مسلسلات المصري والسوري والخليجي، وبين العراف والعقرب والزوجة التانية وموجة حارة وألف سلامة واسم مؤقت.. رمضان شهر العبادة، وهاي قاعدة الناس كلها مؤمنة فيها، لكن عبادة شو؟ عبادة الله .. وللا عبادة المسلسلات؟؟ صاحبي فرج رد عليّ: "مش مهم ما كلها عبادة".. أديتوا خمساوي على ساحلو.. وبسرعة قلت "اللهم إني صائم".