قرار التقسيم في السبعة وأربعين كان بيحكي ثلاث مناطق، ما رضيناش فيه.... بعديها صِرْنَا نقول على قولة المجادلة "طَكْطَكَتْ وجنَّحَتْ ويا ريتهم قسَّمُوا".. أجت بعديها النكسة وانتكسنا... بعديها مؤتمر "اللاءات الثلاث" في الخرطوم.. لا سلام مع إسرائيل، لا اعتراف بإسرائيل، لا مفاوضات مع إسرائيل" و"بالصلاة عالنبي"... وبعديها طرَّدونا من الأردن ومن لبنان ومن تونس، ولمْلَمْنا حالنا وقلنا عالجزائر لنعلن دولتنا في الثمنية وثمانين... استقلينا بدولة دون حدود ولا قواعد، بعديها بدأت "اللاءات الثلاث" تتراجع ومع الدولة، رفعنا غصن الزيتون طول برج ايفيل" "أسمر ومشَرْشِرْ" عالطالع والنازل، عالجاي والرَّايح معانا الزيتون الأخضر، و اعترفنا باسرائيل حتى النخاع، و ضلينا نتفاوض من الثلاثة وتسعين لألفين وستة لحد ما انقسمنا و"انفسَخنا" وصرنا دولتين وحكومتين ومشردين وملطَّمين.... وضلِّينا نفاوض ونفاوض لحد ما حصلنا على دولة "بدون عضو" "زي قرن الخرنوب أعوج وأسود".... شايفيين لوين وصلنا لدولة "عقيم".. بعديها "تعلَّقي يا خَايبَة في الحْبَال الدَّايبة"... صار بدنا رواتب واعمار... بس دخيلكم بدناش وطن.... بدنا رواتب واعمار.... بدنا دولار، والمعبر يفتح، والاسمنت يدخل.... حالنا في النَّازل، والله و"أفتِكْركْ بإيه يا بَصَلَة وكل عضَّة فيكي بدمعة".... ورجعنا نقول: "طَكْطَكَتْ وجنَّحَتْ ويا ريتهم قسَّمُوا"، أو نتسَوَّلْ بين الدُّوَل "وطَنْ لله يا محسنيين"... [title]وأنا مالي يا ابو يزن دع الخلق للخالق[/title]
نحن نستخدم ملفات تعريف الارتباط لتخصيص تجربتك ، وتحليل أداء موقعنا ، وتقديم المحتوى ذي الصلة (بما في ذلك
الإعلانات). من خلال الاستمرار في استخدام موقعنا ، فإنك توافق على استخدامنا لملفات تعريف الارتباط وفقًا لموقعنا
سياسة ملفات الارتباط.