الرواتب بُكْرَة، بعده... الخميس... الجمعة بعد الصلاة... الأسبوع القادم، ألف شيكل... مائتي دولار.. عالبنك... عالبريد.. ألف دولار على ثلاثة دفعات... من غزة.. من الضفة... من رامي الحمد الله... من اسماعيل هنية، أبو شهلا صرَّح، بعديها بسيسو، مع شوية اشاعات في البلد... الله يعين الموظفين. يا عمي صار الموظف "روحوا زغرانه" و"الطَّفران أخو المجنون" حلُّونا خلي البلد فوضى، خربانة خربانة، تخرب عالكُل... احنا "كُلْ ما دَقْ الكُوزْ في الجرَّة" بتطلع إلنا أزمة جديدة؟! حرب، منخفض، رواتب، معابر، حدود، اسمنت ايجار.. شو ضايل؟! ضايل يضربونا "نووي".. شو مستفيدين من هيك دولة". يعني لازم نموت من الجوع، أو نسلِّم إلِّي الفوقاني والتحتاني لحتى نصير بدنا دولة؟! قد تكون حالة الفوضى حلاً مقترحاً... أو التحالف مع أطراف أخرى... لماذا علينا أن نجرب حلين فقط إما الحرب أو التسليم؟! لماذا لا نتحالف مع أي جهة تستطيع اخراجنا من الأزمة، لماذا لا نجرب الخيارات البديلة الثانية.. التحالف مع دحلان، التحالف مع الشيطان، التحالف مع "غراب البين" حتى تخرج غزة من أزمتها، لأن هذا العالم لا يتعامل بالقيم، هو يتعامل بالمصالح فقط، القصة صارت "عفص وكرفس وشيء يصد النفس"... [title]وأنا مالي يا أبو يزن دع الخلق للخالق[/title]