شوف عزيزي أنا شخصياً نمت والكهرباء قاطعة، وصحيت والكهرباء قاطعة هذا بعد جدول اطنعش بستة... والغريب العجيب أن شركة توزيع الكهرباء "ملعون ظلاع أبوها" قطعت الكهرباء على بيتي الأسبوع الماضي لأنه علي مستحقات 4000 شيكل، وشبكناها باللِّي تِعْرَفُه... طيب جاري يا ولاد (...) عليه 129 مليار دولار مستحقات، وجاري الثاني عليه مستحقات ثلث موازنة موزمبيق، والثالث عليه مستحقات بتحل أزمة كوبا، والرابع عليه مستحقات من أيام الإدارة المدنية، والخامس عنده عشر خطوط قلَّابْ. لا لا يا حبيبي والرئيس محمود عباس بنفسه عليه كهرباء "64477 " شيكل يعني حوالي 17500 دولار -حسب وثيقة تداولها نشطاء الانترنت-... والغريب العجيب عزيزي أنه شركة الكهرب الها ثلاث سنين وهي شغالة عالمنحة القطرية، وقود ببلاش، طيب ليش بندفع فواتير... هي المنحة جاية لموظفي شركة توليد الكهرب اللي الواحد فيهم بيقدح 3 الاف دولار واطلع... أحـ... فعلاً.. ولكم انتو بتستحوش ساكنين في مخيم لعين، الكهرب زفت والميَّة زفت، والشوارع زفت، وفش مجاري ولا بنى تحتية ولا فوقية... آخر مرة شفت شارعنا بدون مجاري وقاذورات قبل ملحمة ستالينجراد، وبدكم فواتير لسا، والله مفروض تدفعوا النا مصاري عشان ساكنين هالسُّكنة. [title]وأنا مالي يا أبو يزن دع الخلق للخالق[/title]