قرأت في الأخبار تحقيق أمريكي: إسرائيل تسرق الغاز الفلسطيني وتبيعه للسلطة..... عادي جداً ولا في أي إشكالية!!! ما السلطة بتسرق الشمينتو، واللبن والتوت والحديد والكلور والشقق، والمساعدات والمعونات، وفلوس الإعمار، وكمان بتسرق البنزين والسولار وبتبيعوا لشركة الكهرب، وشركة الكهرب بتسرق نصه، وبتبيع الكهرب للمواطن بسعر (الزعفران) المخصَّب... رسمي هيك كتير، الموطن ظهرُه قوَّس من كثر ما تسرقوا على ظهره.. يا نيَّاله المواطن قصْتُه عاملة زي واحد بيتحمم، وواحد فتح حنفية المية الباردة في المطبخ (لَسَعْ أُمْ ظَهْرُه لَسِعْ)، ومباشرة بعد شوي واحد ثاني فتح حنفية الميَّة الساخنة (شلْ أمله شل، تجمد تجمداً لا سلكياً دون مراعاة التوقيت الشتوي أو الصيفي) فصار المواطن مخدَّر رسمي، نفسي أعرف مين اللي بيلعب في الحنفيَّة... يا عمي والله غلط، مش صح (سِرقةَ من سِرْقَةَ بتخرب المعدة ... )، وكله بالقانون، وكله بما يرضى الله يا أولاد الحنفية.