بدون "كالكوليتر"، الرئيس محمود عباس ينوى تشكيل حكومة جديدة رقم سبعة "7" في عهده، رقم خَمَسْطَعِشْ "15" منذ تأسيس السلطة الفلسطينية، يعني كل اطْنَعشَرْ "12" شَهِرْ بدنا حكومة جديدة، زي "صنوبرصات" السيارة بالزبط... وكل ما "دق الكوز في الجرَّة" رح نطلع بحكومة جديدة، والله لبنان ما عملتها!! سؤال لولبي يعني الحكومة الجديدة حتكون من كوكب السويد مثلاً ولَّا "من زيتُهُ إقْلي له" الخلاف أنه الحكومة فصائلية ولا تكنوقراط؟ وعباس بدوش ياها فصائلية أصلاً –حسب مصادري الخاصة- فالقصة إيد وفرَّغت بأختها، وعِدٌّو علينا وزراء جداد، ومن هين لعشر سنين بنصير في كل عيلة وزير، ولكل وزير مرافقين، وبهيك بتصير البلد "وزراء ومرافقون"... وبعد لقاءات مكوكية عقدها الطرفان –عباس وحماس مع المجتمع الدولي- توصل الطرفان، عباس بده حكومة تنبذ الارهاب وتعترف بكل شيء، وأرسل لجنة المنظمة على هذا الأساس –إلِّي حماس والجهاد أصلاً مش جزء منها- وحماس ترفض الضغوطات الدولية وفي نفس الوقت "مزنوقة"، وع "هِيكْ" عودة للمربع الأول، حكومة في الضفة وحكومة في غزة... وإلى لقاء قريب في "دار فور" برعاية جديدة وخصم جديد للتوصل إلى اتفاق المصالحة السبعين، وكل عام وأنتم بألف خير... وأنا مالي يا أبو يزن دع الخلق للخالق