يااااه عشر سنوات والسر محفوظ في قلب الرئيس محمود عباس، وأخيراً صرح أنه يعرف قاتل عرفات، والله أعلم لم يفصح عن السر لأنه لم يرغب بالفتنة، أو يمكن لم يرغب بالفضيحة؟ فضيحة شو؟ يعني شوية فضايح على شوية ابتزازات، على شوية مماسك، أنت ماسك علي وأنا ماسك عليك؟ طيب لماذا لم يخبرنا من اليوم الأول أنه يعرف قاتل عرفات؟ جاي الآن بعد ما وصلت بينه وبين دحلان سوق الخميس، وباقي تصفية الحسابات يا أنا يا أنت؟
شفت كيف هي البلد ماشية هيك؟ كلها مماسك ومصالح و"قال له لابد لك قاله صاحي لك".
طيب مادام الرئيس يعرف من قتل عرفات هل يعرف من قتل ناجي العلي؟ ومن قتل غسان كنفاني؟ ومن قتل خليل الوزير؟ وأخيراً من قتل عمر النايف؟ بما أنه هو رفيق الثورة من زمااان زمااان، ومرت كل هذه الأحداث عليه وهو حي؟!
صحيح وليش لجنة التحقيق وليش هالزوبعة الي ما الها أي قيمة ما دام سيادة الرئيس عارف القاتل من عشر سنين؟ إيش يعني سايبنا نحزر ونفزر، وتشوفنا شاطرين بنعرف ولا لا؟؟
البلاد بتضيع يا سيادة الرئيس وعلى كل الملفات أن تفتح وخلي اللعب عالمكشوف خلينا نشوف آخرها معاكم
