بعد انتهاء خطاب أبو مازن في الأمم المتحدة .. أبو الدبعي طالع من بيته "طرابيق" دخل على السوبرماركت واشترى كرت جوال أبو 100 شيكل " قبل شوية تداينها من جوز أخته " عبى الكرت بسرعة وأجرى عدة إتصالات هامة : 1_ ألو مرحبا أبو جمال كيف حالك وكيف ولادك وكيف مخيم اليرموك ؟ اسمع يا أبو جمال يللا جهزلي حالك وبأسرع وقت بيع البيت والعفش بقد ما يجيب وبكرا الصبح الساعة خمسة بتنزل على الحدود بتلاقي باصات العودة بتركب في الباص اللي بيروح على حيفا على طول، وبلغ جيرانك وولاد حارتك يللا ما ظل وقت بدنا نرجع على دولتنا ... سلااام . 2_ ألووو أبو رعد حبيبي يا حاااج إسمع ! العمال اللي عندك في الكسارة مش رح يكفوا يا حبيبي علشان هيك بدي تجيب عمال قدهم مرتين ، جاييك شغل كتير كل الحواجز اللي في الضفة والمكعبات الإسمنتية رح تكون من نصيبك ورح تشتغل لما تزهق حالك ، ومن اليوم مفيش حواجز ولا مكعبات اسمنتية في الضفة كله للكسارات ودقي يا مزيكة !. 3_ ألووو أبو رمزي بدك تزور ابنك في الضفة صح ؟ طيب يللا حضر حالك رح نطلع من معبر ايرز من غير تصريح ونعدي على الخليل طوالي، ورح نتغدى في الخليل عند صاحبي " أبو السعيد " وبعدها نهوّد على نابلس مباشرة لتشوف ابنك وتكيف يللا ما بدي تأخير يخووو !. 4_ألوووو أم العبد حضري حالك يختي جواز سفرك رح يكون جاهز خلال 22 ساعة بالكثير مفيش حاجة بعد اليوم اسمها غزة وضفة ، خلص صرنا دولة وحدة ورح تطلعي تتعالجي في مصر بدون أي مشاكل ورح أطششك بعدها على كفر الشيخ قصدي على شرم الشيخ لتشمي الهوا وتنبسطي . 5_ الووو أبو خالد ابشر يا عم هاي ابنك خالد اللي صار له مسجون أكثر من 20 سنة رح يطلع خلال اسبوع هو وكل المساجين ومش رح يظل أسير واحد جوا السجن بعد الدولة ومفيش سجون بعد اليوم . 6 _ الووو معي خالد مشعل صح ؟ أهلين ابو الوليد يللا يخووو بلغ جماعتك من اليوم مفيش ولا سجين سياسي في الضفة كلهم رح يطلعوا الدولة للجميع يا خاال ، بس معلش يا صاحبي وصيهم ما يعملوا مشاكل الله يخليك . 7 _ ألووووو ... عفواً لم يتبق لديك رصيد نرجو زيادة رصيدك ! ، يا خسارة كنت بدي أكلم أبو مازن أسأله لأتأكد : في منه كلامك يخووو ؟ ولللا رح نلبس خزوووق الكرت والميت شيكل !؟