دخل " أبو الدبعي " إلى القهوة ، طرح السلام وجلس ، واحد شاي سكر زيادة لو سمحت . نظر إلى التلفاز، نشرة الأخبار أوشكت أن تنتهي، لفت انتباهه كما الجالسون من حوله الخبر الأخير، الذي يتحدث عن قيام رئيس غربي بممارسة هواية صيد الأسماك برفقة أسرته بعيداً عن صخب السياسة ! . وما أن انتهى الخبر إلا وبدت علامات الدهشة والإعجاب من قبل رواد القهوة ، هاي الرؤساء اللي عن جد، هذا التواضع اللي بدنا اياه ، أخخخ لو عنا كان نص الجيش مرافق اله .. وهكذا ! إلا أبو الدبعي كالعادة كان له رأياً آخر ، نظر إلى الجميع نظرة ازدراء وقال : طول عمركم أغبياء مش عارفين مصلحتكم وين !؟ . نظروا إليه و " كالعادة " أنصتوا له ! .. يعني بالله عليكم هذا شكل رئيس !؟ ، سايب مشاغله وهموم الناس ومصالح دولته وجاي يضيع وقته " الثمين " في صيد السردينا والمليطي !؟ . يا عيب الشوم على هيك رؤسا ! ، "أجرمنعنه" الرئيس عندهم يدوب يكمل أربع سنوات ، وعلى طول الشعب بيغيره وبيسقطه ! ولا احكولي عمركم شفتوا رئيس أمريكي ولا فرنسي ولا ألماني قعد في الحكم أكثر من 10 سنين !؟ ، وهذا أكبر دليل على أنهم رؤساء فشلة ... الرؤساء الحقيقيين اللي ما بيمنعهم من خدمة شعبهم إلا الموت بس !. قاطعه أحدهم : بس يا أبو الدبعي لسه الرئيس يضيع وقته في صيد السمك أحسن من تضييع الوقت في قتل شعبه زي اللي بيصير في سوريا واليمن "هالحين" ! . نظر إليه أبو الدبعي كنظرة الحماة المتغطرسة إلى الكنة الغلبانة : ولك ايش بتحكي يا عبيط ؟ ولك اللي بيصير في سوريا واليمن مؤامرة ضد الشرفاء ، ولك من وين بدها تجيب سوريا رئيس زي بشار اه احكيلي من وين ؟ ومن وين بدنا نلاقي عقل متزن ورشيد يحكم اليمن مثل علي صالح ... واللي بيعملوه صح ، اللي بيحاول يخرب ويقتل ويخل بالنظام لازم ينقتل حتى لو كان طفل صغير مقمط في السرير ، بعدين شو فهمهم هدول بالسياسة ؟ . ولا بدك إياهم يروحوا يصيدوا سمك "بلاميدا" زي الرئيس المعتوه اللي شفتوه قبل شوي . الرئيس يخو لازم يفكر ويبدع وبس ، مش لازم نشغله بأمور تافهة ، ولو إجا على باله ياكل سمك ساعتها المخابرات بتعرف على طول و بإشارة سريعة للقوات الخاصة وبمشاركة وحدة المدرعات بنجيب حسبة السمك بحالها على قصر الرئيس ، وبمساعدة وزارة العمل ووزارة الداخلية والامن الوطني بنظف السمك وبنتبله وبنحشيه وبنقليه وبنزوقه وبنقدمه للرئيس ياكل ويتمتع وإذا عايز شوي نشويله هذا رئيس يا عالم مش أي كلام ! . يا جماعة أنا طولت عليكم في الحكي بس لازم تعرفوا شغلة مهمة اللي بيصير في الوطن العربي مش ثورة ، هذه مؤامرة وحسد معيشة من رؤساء أمريكا وأوروبا ، لأنهم مش قادرين يفرضوا على شعوبهم إنهم يستمروا في الحكم مدى الحياة مثل الزعماء العرب . بس مين يفهم وومين يوعى آخخخ لو معك فلوس يا أبو الدبعي كان زمان ردوا عليك وسمعوا كلامك ! .