أتاري وأنا مش داري إنه اللجنة الإدارية كانت شوية حركات وخلاص، عزام الأحمد أقسم بالله وحلف مليون طلاق على مرته إنه بعد عشر ساعات بالزبط وبالتمام والكمال من حل حماس للجنة الإدارية ستباشر حكومة التوافق عملها، هي خلصن العشر ساعات يا أبو نداء وما شفنا لا أبيض ولا أسود.
ما علينا المهم حلينا اللجنة وصارت غزة مفتوحة سرح مرح والباب بيفوت جمل وهلقيت ما في حجة لجماعتك حتى يلغى عباس إجراءاته ونعمل انتخابات وخلينا نشوف.
بدت التصريحات من العالول وجه الفلس إنه حل اللجنة غير كاف.. بس عشان تعرفوا الفرق في تعامل جماعة رام الله مع حماس ومع الإسرائيليين وهلقيت يتفضلوا بعد ما بعطنا الدمل يتراجعوا عن إجراءاتهم.
الناس الغلابا اللي بستنوا في خلقة هالراتب كل رأس شهر يتراجعوا عن الخصومات ويعطوا الناس راتب كامل، لأ مش بس هيك يرجعولهم اللي تم خصمه.. ولا ليكون اللي راح ما برجع؟، ولا المشكلة العويصة مشكلة القرن الكهرباء ضايلة قصة البلو الله يبلى اليهود بالعارض ولا بدنا نسمع قصة جديدة كمان يومين؟.
على العموم هي غزة فاضية يتفضل عباس وحكومته يشيلوها ببلاويها وعقولة هذاك الراجل حأحكها (..) في الحيط لو ما طلعوا مبررات جديدة، تعلموا من اليهود خوات الشليتة، مهو من عاشر القوم صار منهم.
قاعدين بنستنى في أبو نداء يرجع لرام الله يشوف القيادة إيش حتسوي بعد حل اللجنة الإدارية، ما فيش أحلام وردية الجماعة مش ناويين على خير يعني مش حيرجعوا الكهرب أكثر من ساعتين زيادة والمعبر ثلاث أيام كل 6 شهور بدل كل 8، وأنا مش متفائل عشان ازهقنا وعودات بالانفراجات ونكون واقعيين شوي، حجة اللجنة شلناها خلينا نشوف.. قلتلي 10 ساعات يا أبو نداء؟!!.
